Nagakatingala kag nagasaka gid ang kilay sang kadam-an nga tawo sa Fuzhou, China, bangud sang isa ka talagsaon nga sahi sang operasyon nga naagyan sang isa ka lalaki matapos siya madalahig sa isa ka disgrasya sang tuig 2013. Ginkilala ang lalaki nga si Xiaolian, siya ang nakaangkon sang tuman nga damage sa iya ilong matapos nga daw halos madunot gid ini sa aksidente samtang nagamaneho sang iya salakyan. Bangud sang impact sang aksidente, gilayon siya gindala sa Fujian Medical University Union Hospital, kun sa diin, base sa resulta sang eksaminasyon, tuman gid ang epekto sa cartilage sang iya ilong. Gani, nagproponer ang mga doktor sang isa ka pinasahi nga “nose replacement” surgery. Agud mabalik ang porma kag hitsura sang iya ilong, nagkuha sang panit ang mga doktor halin sa iya agtang kag ginporma ini nga daw ilong. Ginkuhaan man siya sang cartilage halin sa iya mga gusok (ribs) kag ginbutang ini sa panit nga ginporma. Ginpahayag nga pila pa ka bulan ang ginpaabot sang 22-anyos nga pasyente antes matapos ang porma sang bag-o nga ilong nga temporaryo nga ginbutang sa iya agtang. Sang natapos na kag naayo na sang husto ang porma sang ilong, gilayon siya ginpaidalom sa operasyon sa amo man nga tuig, agud ibalhin na sa iya natural nga lugar ang ginpatubo nga ilong halin sa agtang. Madamo sa mga tawo ang nabilib kag nahangawa sa amo nga klase sang medical procedure, kag suno pa sa iban, daw indi na gid matuod nga ang syensya subong may gahum na nga daw milagro.
