Nabutang sa bag-o nga world record karon ang Chongqing sa China pinaagi sa isa ka pinasahi nga light show nga ginpatigayon sa diin ila gingamit ang indi magnubo sa 11,787 ka mga drone. Kilala na ang China sa mga dagko nga drone light show, pero ang “Charming Chongqing”, isa ka event nga gin-host sang ciudad sa diin ginkabiliban gid ini sang mga tawo Ang nasambit nga drone light show ang gintambungan sang kapin 100,000 ka tawo sa diin “sulit” gid nga nangin Guinness World Record holder. Sini nga Hunyo 17 sa downtown Chongqing ginpatigayon ang pinakadaku nga drone light show sa bug-os nga kalibutan. Nagsiga ang kalangitan sang gab-i, kag nag-assemble ang ini nga mga drone sa nagkalain-lain nga mga porma—mga character kag mensahe nga naghatag inspirasyon kag excitement sa mga tawo. Nagpakita ang show sang mga dako kag matahom nga disenyo nga ginhalinan sang kasaysayan kag kultura sang China — halin sa mga manami nga bulak, detalyado nga skyline sang ciudad hasta sa mga local nga mascot, ini tanan ang ginbida sa nasambit nga event. Bisan pa man importante nga malipay ang mga tawo, ang pag-host sang pinakadaku nga drone light show sa kalibutan ang nangin pamaagi man sang Chongqing sa pagpakita sang ila kusog kag kapasidad sa drone cluster technology, low-altitude management, kag bilang isa ka sentro sang drone manufacturing, technology and research.
