Nagdangat na sa masobra 18,000 ka mga Bacolodnon ang nabuligan sang Bacolod Comprehensive Health Program (BacCHP).
Ini ang nangin kabahin sang ginpresentar ni Outgoing Bacolod City Mayor Albee Benitez sa iya ika-tatlo kag katapusan nga State of the City Address (SOCA) sa Bacolod City Government Center subong nga adlaw, Hunyo 25, 2025.
Suno kay Benitez ng as of June 2, 2025 yara na sa 91,202 ang mga BacCHP cardholders kun sa diin yara sa 303,434 ang mga registered members kag dependents.
Pahayag sang alkalde, nagdangat na sa malapit P195 million ang balor sang financial assistance ang nahatag para sa mga Bacolodnon.
Nahibaluan nga ang BacCHP ang isa sa mga flagship program sang Administrasyon ni Benitez nga nagahatag sang libre kag dekalidad nga healthcare services sa mga nagakinahanglan nga mga Bacolodnon sa pito ka mga partner hospitals sa ciudad.
Sa idalum sang BacCHP ordinance, ginagarantiya sang ciudad ang P15,000 para sa hospital bills sang kada cardholder kag sang ila nga mga dependents.