Ginpresentar ni Outgoing Bacolod City Mayor Albee Benitez ang mga kadalag-an sang mga proyekto kag inisyatibo sa idalum sang iya administrasyon sa sulod sang tatlo ka tuig.
Ini ang sandig sa ginpatigayon nga State of the City Address (SOCA) sang alkalde sa Bacolod City Government Center subong nga adlaw, Hunyo 25, 2025.
Sa iya SOCA, ginpakigbahin sini ang pagnubo sang kadamuon sang Job Order sa ciudad sa iya pag-establisyar sang digital profiles para sa mga JO nga suno sa alkalde, nagareport, naga-obra kag wala
naga-murto-murto lamang.
Suno kay Benitez, yara sa 5,193 ang kadamuon sang mga JOs sang nagligad nga administrasyon apang sa idalum sa iya liderato, nagnubo ini sa 3,893 kun sa diin nagdangat sa P154 million ang nangin savings sang ciudad.
Samtang, ginbida man sang alkalde ang programa sini nga maghatag sang security features para sa mga dokumento kag identification kun sa diin ang Bacolod ang nangin Pilot sang IDs nga may yara sang QR Code.
Ginpakigbahin man sini ang mga proyekto sang Benitez Adminstration sa bahin sang mga dalanon, pagkakas sang mga spaghetti wires, peace and order, pag-install sang solar streetlights, pag-improbar sang mga merkado sang ciudad kag ang inisyatibo sa ikaayong lawas pinaagi sa programa sang Bacolod Comprehensive Health Program (BacCHP).
Dugang pa diri ang padayun nga pagpasanyog sang Turismo sang ciudad pinaagi sa kultura, pagpakilala sang identity sang Bacolod kag pagdul-ong sa kalibutan sa ikasarang sang ciudad.
Nagpasalig man ang outgoing mayor nga padayun nga magasuporta sa mga programa kag proyekto sang masunod nga mga administrasyon kag magahatag sang suporta gikan sa gobyerno nasyonal.
Naglawig sa masobra isa ka oras ang kabug-usan nga city address sang outgoing city mayor nga gintambungan sang mga opisyales gikan sa nagka-lain nga LGU sang probinsya, barangay officials, kag mga empleyado sang ciudad gikan sa nagka-lain lain nga sektor.