PROVINCIAL CAPITOL – Nagmartsa ang mga katapo sang nagkalain-lain nga sector sa mga dalanon sang Bacolod City agud ipanawagan ang pagdampig sa dunang-manggad kag maayo nga pang-gobyerno, Byernes sang aga.
Ang People’s March for Environmental Justice and Good Governance ang nagsugod sa San Sebastian Cathedral kag nagdulog sa Negros Occidental Provincial Capitol kun sa diin gin-updan ini sang mga lideres kag tiglawas sang simbahan, mga pamatan-on, mga kababainhan, mga mananagat kag mga mangunguma.
Gintugutan nga makasaka sa Capitolio ang mga nag-upod sa martsa kag nagpakigdayalogo upod kanday Provincial Administrator Atty. Rayfrando Diaz II, Provincial Legal Officer Atty. Alberto Nellas Jr. kag Provincial Environment Management Office (PEMO) Head Atty. Julie Ann Bedrio.
Ginpatpat ni Atty. Diaz ang mga programa, proyekto kag tikang sang Provincial Government para sa pagpangapin pag pagtipig sang dunang-manggad sa Negros Occidental.
Bilang sabat, gin-turnover sang grupo, sa pagpanguna sang Negrosanon Initiative for Climate and Environment (NICE), ang People’s Environment Agenda nga pirmado sang 34 ka nagkalain-lain nga organisasyon.
Ini ang isa ka panawagan kay Governor Bong Lacson kag tanan nga local officials sa probinsiya nga mag-akto gilayon particular ang pagdihon sang mas makusog nga environmental policies, mangin fair and inclusive sa paghimu sang mga desisyon, kag pag-respeto sa indigenous kag rural communities karon nga magasugod na ang bag-o nga termino sa Hunyo 30.