PROVINCIAL CAPITOL – Nagdangat sa 37 tanan ka mga pamilya ang nagbiya sa evacuation center agud magbalik sa ila nga puluy-an sa Barangay Cabagnaan sa banwa sang La Castellana kaina sang aga.
Ini ang sandig sa record sang La Castellana Municipal Disaster Risk Reduction and Management Office angot sa mga internally-displaced persons nga nagmato-mato sa pagpauli nga wala sang koordinasyon sa camp manager.
Ginpahayag ni La Castellana MDRRMO Head John de Asis nga ang mga nagpauli ang gikan sa temporary evacuation camp sa Senior High School campus sang La Castellana National High School.
Suno kay De Asis, sa pihak nga yara ang presensiya sang camp manager, wala nagpapugong ang mga evacuees sa pagpauli.
Base sa video nga gin-post ni Jerryku Aldea nga magapauli sila bangud nagaantos sila sa temporary shelter kun sa diin exposed sila sa init kag ulan kag nagatulo pa ang ila nga tents. Dugang pa sini, ginpabay-an sila kaangay sang mga sapat.
Hugot naman ini nga ginpanginwala sang MDRRMO Head kag nagpaathag nga sa covered court nagatiner ang mga ini samtang ginatinguhaan man sang banwa nga mahatag ang kinahanglanon sang mga evacuees.