BACOLOD CITY- Pilason ang isa ka lalaki nga nasal-an aswang matapos nga gintiro sang gina-alegar adik sa Abada Escay, Barangay Vista Alegre sa ciudad sang Bacolod, Sabado sang gab-i, Hunyo 28.
Ang biktima ang ginkilala nga si alias “Rudy”, 62-anyos, kag residente sa amo nga lugar; samtang ang suspek ang ginkilala nga si alias “Roberto”, 52-anyos, kag residente sang Purok Kabugwason Barangay Mansilingan sa amo nga ciudad.
Base sa pahayag ni Police Captain Dax Santillan, Station Commander sang Police Station 7, possible nga yara sa idalom sang impluwensiya sang illegal nga druga, rason nga iya nasal-an nga aswang ang biktima kag ini ang iya gintiro.
Nakaagom sang pilas sa dughan ang biktima, kag ini ang nagapabilin pa sa karun nga nagapaayo sa ospital.
Nahibaluan nga ang suspek ang isa ka drug personality kag may kaso sadto nga frustrated murder.
Narekober kay Roberto ang isa ka caliber .45 pistol kag 12 grams sang ginapatihan shabu nga nagabalor P81,600.
Dugang pa ni Santillan, nakuha sa crime scene ang isa ka basiyo sang caliber .45 kag ini ang igapaidalom sa ballestic examination agod makompirmar kun ini ang match sa armas nga narekober sa suspek.