PROVINCIAL CAPITOL – Ginatawag sang La Castellana LGU kag Incident Management Team ang atensyon sang mga tawo nga nagkumbinser sa mga evacuees nga magpauli sa pihak nga wala sang pahanugot sang mga otoridad.
Sa social media page sang banwa, ginpanawagan ang mga nagtipon sang mga internally-displaced persons (IDPs) sa Senior High School Evacuation Center kag nagtulod sa mga ini nga magbalik sa ila lugar sa Barangay Cabagnaan.
Ginapasumiter man sang written explanation ukon personal nga magpaathag sa IMT ukon kay Punong Barangay Bon Sacapaño sa sulod sang 24 oras ang netizen nga nagkuha sang video sang mga IDPs samtang sila ang nagatuyo sa pagpauli kag nag-post sini sa social media.
Magluwas sini, ginapa-delete man ang amo nga post sa Facebook.
Suno pa sa statement, “Ang pag-gwa sang mga IDPs or Evacuees sa ila nga Evacuation center kag pagbalik/pagpuli sa Barangay Cabagnaan wala sang Permiso okon Consent sang Local Government of La Castellana kag Incident Management Team (IMT).”
Angot sini, ginahingyo man ang nagpauli nga evacuees nga magbalik sa ginhalinan nga evacuation center.
Nahibaluan nga ginatugutan man ang mga IDPs nga magabisita sa tagsa nila ka mga puluy-an sa sulod sang 6-kilometer extended danger zone durante sang window period ukon humalin las-6:00 sa aga tubtob las-4:00 sa hapon.