LA CASTELLANA- Miscommunication kag misinformation suno sa Incident Management Team (IMT) ang report angot sa pagbalik sang 37 ka pamilya ukon 210 ka indibidwal sa ila puluy-an sa Barangay Cabagnaan sa banwa sang La Castellana, kaina sang aga, Hunyo 30.
Ginpahayag ni Police Major Rhojn Darrel Nigos, head sang IMT, miscommunication lamang ang impormasyon angot sa pagbalik sang pila ka mga Internally Displaced Person (IDP) sa ila puluy-an bangod apat sa 37 ka pamilya ang nagbalik na sa evacuation center nga nahamtang sa La Castellana National High School- Senior High, sini nga hapon.
Ginklaro ni Nigos nga padayon nga ginapatuman ang window visit sa sulod sang 6km extended danger zone sa oras nga las-6 sang aga tubtob las-4 sang hapon, rason nga pila ka pamilya ang gilayon nga nagbalik man sa evacuation center.
Nagalaom ang IMT nga magabalik ang nabilin nga IDP’s nga yara sa sulod sang extended danger zone sa evacuation center sini nga gab-i.
Kun sila ang indi magbalik sini nga gab-i, sila ang hatagan sang 24 ka oras nga magbalik ukon ginakabig nga humanitarian consideration, apang kun indi sila sa gihapon makabalik, iga-implementar na ang local ordinances kag ifile ini batok sa ila.
Nagapanawagan si Nigos sa mga IDP’s nga mag-agi sa insakto nga proseso antes magsulod sa window visit.