PROVINCIAL CAPITOL – Ginpatigayon subong nga adlaw ang groundbreaking ceremony sang balor P100 million nga pipeline project sang Kabankalan City Water District (KCWD).
Ang seremonya ang ginpangunahan ni KCWD Chairman of the Board Luis Azcona kaupod ang local nga opisyales sang Kabankalan City. Yara man si Sugar Regulatory Administration (SRA) Administrator Pablo Luis Azcona nga anay chairman sang KCWD.
Nangin dinapit nga bisita sa kahiwatan si Senator Juan Miguel Zubiri nga amo ang naghatag sang P50 million para sa phase one sang nagligad nga tuig samtang P100 million naman subong sa phase two sang amo nga proyekto.
Plano sini nga magbubo sang dugang nga P100 million tubtob P150 million tubtob matapos ang proyekto sa tuig 2026.
Ginpabutyag ni Zubiri nga may ice plant ini sadto sa Kabankalan City apang napilitan nga isira bangud mas mahal pa ang ginabayad sini sa tubig kun ikumparar sa kuryente. Nagsulat man ini sadto sa water district apang wala ini naaktuhan.
Magluwas kay Zubiri, pila man ka mga investors ang nag-isol sa pagnegosyo sa amo nga ciudad bangud sang pareho nga problema.
Sang nagligad nga tuig, nagpalapit si SRA Administrator Azcona sa senador kun ano nga proyekto ang sarang sini nga mahatag sa ila nga ciudad kag tubig ang ila napilian.
Nahibaluan nga malapit sa tagipusuon ni Zubiri ang Kabankalan City bangud tumandok sang Barangay Talubangi ang iya nga amay.