Nagprangka si La Castellana Vice Mayor Rhummyla Nicor-Mangilimutan nga “depleted” na ang budget sang lokal nga panguluhan para isustener sa mga internally displaced persons (IDPs) nga nagapabilin pa sa mga evacuation centers.
Ini ang nangin pahayag sang bise alkalde kasunod sang una na gin-report nga pagpauli sang mga IDPs sa ila mga puluy-an sa sulod sang danger zone apisar wala pa nagtugot ang LGU kag Office of the Civil Defence (OCD).
Sa interview sang DYHB kay Mangilimutan, ginpahayag sini nga bisan siya naluoy man sa sitwasyon sang mga IDPs nga yara pa sa evacuation center apang wala man sila sang may maubra bangud nga wala pa sila sang may ginakaptan nga budget halin sa National Government nga amo ang yabi agud mahatagan sang resettlement ang mga evacuees.
Suno kay VM Mhai, gapasalamat na lang sila sa mabulig sang Provincial Government apang sa ini nga mga tinion, mas kinahanglan man nila ang bulig sang National Government.
Nahibaluan nga asta karon, ginahulat pa sang banwa ang pag-release sang P48 million nga gin-request sini sa National Government nga amo naman ang pagagamiton para sa nasambit nga resettlement sang mga IDPs.