WORLD NEWS-Nautas ang kabuhi sang apat ka tawo matapos nalunod ang ferry nga KMP Tunu Pratama Jaya sa baybayon malapit sa isla sang Bali, Indonesia. Magluwas sa mga nagtaliwan, nagapabilin nga missing ang 38 ka iban pa, samtang 23 naman ang nakaluwas sa amo nga insidente. Nahibaluan, 65 ka tawo ang sakay sa amo nga ferry nga ginalakipan sang 53 ka pasahero, 12 ka mga tripulante, kag 22 ka salakyan sang ini ang nalunod matapos ang 30 ka minuto nga biyahe nagikan sa Banyuwangi, East Java. Sa karun padayon ang search and rescue operation sa lugar, apang isa sa mga problema sang awtoridad amo ang tuman ka baskog sang hangin kag pagbalod.
