Isa ka 8-anyos nga bata sa probinsya sang Uttaradit sa Thailand, nga ginpabayaan sang iya iloy nga drug addict ang masami naga-upod sa iya mga naga-istorya diri pinaagi sa pagtaghol. Si Paveena Hongsakul sang Foundation for Children and Women ang nakabati sang istorya sang amo nga bata nga nagapuyo sa ginakabig nga “red zone” ukon lugar nga puno sang druga sa Uttaradit. Ginpabayaan siya sang iya iloy kag magulang nga lalaki sa sulod sang madugay nga panahon, tubtob sa nagsugod na siya magpangabuhi pareho sa mga ido nga kaupod niya sa adlaw-adlaw. Ginpahayag nga natukiban ini sang principal sa Lap Lae district nga nagsiling nga ang iloy sang bata isa lang ka beses nagdala sa iya sa eskwelahan agud lang makakuha sang benepisyo, pero wala gid ini siya ginpa-enroll bilang estudyante. Wala man ini gani nakaagi tapak sa kindergarten. Tungod nga wala siya sang palangga kag atensyon halin sa iya pamilya, ginkabig sang bata ang grupo sang mga ido bilang iya pamilya. Imbes nga maghambal pareho sang tawo, nagsugod siya mag-taghol pareho sang ido. Nag-coordinate si Hongsakul sa mga pulis sa Lap Lae district agud imbestigaran ang kaso kag ila ginkakibot nga insakto ang impormasyon nga ila nakuha. Sa ginpatigayon nga drug test sa 46-anyos nga iloy sang bata kag iya 23-anyos nga magulang nga lalaki napat-od nga positibo sila sa iligal nga droga. Sa pagpamangkot sa mga kasilingan, nahibaluan nga ang iloy sang bata pirme nagapangayo sang kwarta kag pagkaon, kag tungod sang iya pagka drug-addict, ginpakamaayo sang iban nga mga tawo nga likawan ang ila pamilya. Suno sa Thai media, para protektahan ang pagkatawo sang bata, gindala na ini sa Uttaradit Children’s Home kun sa diin may mga eksperto nga maga-atipan sa iya agud matudluan siya sang insakto nga paghambal pareho sang tawo kag mabuligan siya nga makabaton sang edukasyon nga angay sa iya.
