PROVINCIAL CAPITOL – Ginaduso sang mga kaupdanan sini nga alkalde si Cadiz City Mayor Salvador Escalante Jr. agud mangin masunod nga presidente sang Negros Association of Chief Executives ukon Negros ACE.
Ginpahayag ni Mayor Bading nga siya ang “pinaka-“senior” sa mga alkalde sa probinsiya sa karon kun sa diin yara na siya sa ulihi niya nga termino. Una na siya nga nangin alkalde sang Cadiz sadtong 2001 tubtob 2010.
Sa pihak sang mga pagduso, wala pa nakadesisyon si Escalante apang aminado ini nga possible iya batunon ang posisyon bangud nahuya ini sa iya mga kaupdanan nga mayors.
Nahibaluan nga si Third District Congressman Javier Miguel Benitez ang nagauyat sang posisyon sadtong nagapungko pa ini nga alkalde sang Victorias City.
Ang mga katapo sang ACE ukon ang mga alkalde sa Negros Occidental ang magasapol sa Talisay City sa Byernes agud desisyunan ini.
Samtang, ginpahayag ni Mayor Escalante nga 17 tubtob 18 sa 31 tanan ka mga alkalde sa probinsiya ang katapo sang United Negros Alliance (UNEGA) kun sa diin siya ang secretary general samtang ang nabilin ang katapo sang Love Negros ukon independent.
Apang suno sa iya, may yara sang merger ang duha ka dominante nga political groups sa probinsiya kag lakip na sa alyansa ang pagpili sang presidente sang Negros ACE.