Nagapati si 3rd District Congressman Javi Benitez nga indi solusyon ang pag-ban sang online gambling para madula ini.
Ini kasunod sang statement nj Senator Juan Miguel Zubiri may angut sa pag-file sang bill para sa nationwide ban sang online gambling.
Suno kay Zubiri, makabig na bilang “silent epidemic” ang adiksyon sa pagpanahor ilabi na sa mga pamatan-on.
Ginadumilian sa nasambit nga hagna ang tanan nga sahi sang online gambling sa diin mangin kabahin sa pagtapna sini ang mga Internet service providers, mobile networks, kag mga digital platforms para mag-block sang access sa online gambling.
Ginapanindugan naman ni Benitez nga iya ginasuportahan ang mas istrikto nga regulasyon kag mas hugot nga pagkontrol para protektahan ang mga pumuluyo.
Para sa iya, ang gilayon nga pagpakakas sang online gambling ang makapalala lang sang sitwasyon.
“Gambling is here to stay,” suno kay Benitez. Ang pamangkot lang amo ang kun mas pakamaayuhon nga ma-regulate ang ini nga butang agud makabulig sa kumunidad ukon mangin unregulated ini kag kontrolon sang mga kriminal.
Dugang pa ni Benitez nga sa karon, kapin 40,000 ka mga Filipino workers ang nagadepende direkta sa regulated online gambling platforms.