Agud matapna ang nagapadayon nga problema sang pagbaha sa ciudad kada magtupa ang ulan, plano sang Bacolod City Government nga mag-arkila sang mga magagmay nga dredging machines para sa pagpanghawan sang mga creek.
Ginpahayag sang Bacolod City Disaster Risk Reduction and Management Office (DRRMO) nga mabudlay mag gwa ang tubig sa mga creek bangud sang madamol ngq lutak nga nagabara sa alagyan ka tubig. Ini amo man ang nakita ngsa rason kun ngaa nagabaha sa palibot sang lugar kada mag inulan.
Tungod sang kakitid sang pila ka creek, ginrekomendar sang City Engineer’s Office (CEO) nga ang mga gagmay nga dredging machine na lang ang gamiton, bangud indi masulod ang mga daku nga kagamitan sa pagpanghawan sa mga suludlon nga parte.
Ang nasambit nga suhestiyon ang ginpresentar sang CEO sa council meeting nga ginpangunahan ni Mayor Greg Gasataya.
Ang CEO man ang magapangita sang paga-arkilahan nga mga dredging machines.
Sa subong nga tion, nahawanan na sang DRRMO ang Mambulok Creek kag ang mga palibot sang North Ceres Terminal, GK Village, kag Puno Banago.