Isa ka bag-o nga sahi sang dugo ang nadiskubrehan sang mga French scientists sa isa ka babayi gikan sa Caribbean Island sang Guadeloupe. Ini makaligad ang 15 ka tuig halin sang mabaton sang mga researchers ang blood sample gikan sa isa ka pasyente nga nagpaidalom sa mga routine test antes ang isa ka operasyon. Suno sa French Blood Establishment (EFS), ang 68 anyos nga babayi ang nagaisahanon nga kilala nga carrier sang bag-o nga blood type nga ginatawag nga Gwada negative (-), nga ginsunod sa ngalan sang iya gindak-an nga isla. Ini ang opisyal man nga ginkilala sang International Society of Blood Transfusion (ISBT) sang June sini nga tuig ang pagkatukib sang EFS sa ika-48 nga blood group system sa kalibutan. Ginpahayag sang medical biologist nga si Thierry Peyrard, nga nadiskubrehan ang isa ka tuman ka tumalagsahon nga antibody sa pasyente sadtong 2011 apang wala sila nagpatigayon sang mas madalom nga pagpanalawsaw bangud sa limitado nga resources. Suno kay Peyrard, nga tuig 2019 sang masolbar sang mga siyentipiko ang misteryoso nga blood type gamit ang ‘high-throughput DNA sequencing’ nga naga-highlight sang genetic mutation. Ginpahayag ni Peyrard nga ginsubli sang babayi ang iya tumalagsahon nga blood type gikan sa iya mga ginikanan nga may mutated gene kada isa. Nagalaum karon ang mga siyentipiko nga makakita pa sila sang iban pa nga mga indibidwal nga may Gwada negative (-) blood type.
