BACOLOD CITY- Nakastiguhan ang gina-alegar kawatan sang helmet sa Bacolod City College nga nahamtang sa Barangay Taculing, pasado la-una sang hapon, Hulyo 15.
Ang biktima ang isa ka college student sa amo nga kolehiyo nga residente sang Brgy. Sta Rosa sa banwa sang Murcia; samtang ang suspek amo si alias “Herman”, 47-anyos, sang Barangay Mansilingan.
Base sa pahayag ni Police Captain Rosalindo Pugoy Jr., Station Commander sang Police Station 6, ginkuha sang suspek ang helmet nga natakod sa likod sang motor gamit ang cutter, kag gilayon nga nagpalagyo.
Maswerte nga nakita sang magulang ka biktima ang amo nga insidente, kag gilayon nga ginla-ot si Herman, kag ini ang nakastiguhan sang mga concerned citizen.
Sa inisyal nga rekord, ang suspek ang nakaagi man pangawat sang helmet sa isa ka ospital sa amo nga Barangay.
Preso sa karun ang suspek sa Police Station 6 para sa nagakaigo nga disposisyon.