Natalana nga pasakaan sang kaso nga paglapas sa Republic Act 7832 ukon “Electricity Pilferage” ang lalaki nga nakuhaan sang video samtang ginaalegar nagapangkawat sang kuryente sa Paglaum Village, Barangay Mansilingan, Bacolod City kahapon nga adlaw, July 14,2025.
Sa interview sang DYHB kay Negros Power Engineer Edwin Montemayor, ginpahayag sini nga nagahingalan Alyas “Ben” ang nadakpan nga lalaki.
Siya ang nakita mga nag-tap direkta sa service line side sang Negros Power agud maka-libre sang supply sang kuryente ang iya balay.
Ginaalegar gina kakas lang sini ang gin-tap nga kuryente kun iya masiplatan nga padulong ang Negros Power sa ila lugar kag ibalik naman kun wala na ang mga ini.
Ginahingyo karon sang Negros Power ang mga pumuluyo nga mag-apply sa ila opisina kun luyag sang mga ini makaangkon sang ila kaugalingon nga kuntador.
Dugang pa, mas ginpahapos na karon ang application agud indi na mabudlayan pa ang mga tawo.
Base sa rekord sang opisina, kapin 2,234 na ka mga indibidwal ang nadakpan gapangkawat kuryente kag tatlo na sa mga ini ang “caught in the act” sa pag-ubra sang nasambit nga krimen.