Nagapanawagan si Senator Risa Hontiveros sa mga kumpaniya sang mga e-wallets ukon digital wallets kag super apps nga mag-self regulate. Ini matapos nga nangin mahapos sa publiko ang maka-access sa online gambling paagi sa mga ini. Suno sa senador, madamo ang mga reklamo tungod nga mahapos lamang ang pag-access sa online gambling gamit ang mga smart phone apang gahipos lamang ang mga e-wallets kag super app companies. Dugang pa sini, madamo ang mga kabuhi ang naguba kag pwede maguba sang online gambling kag madamo na ang mga pamilya nga nasakitan. Ginpahayag sang senador nga may mga nabaton nga mensahe ang iya opisina gikan sa mga nagapangayo sang bulig matapos nga naaadik na sa online gambling ang miyembro sang ila pamilya nga nalubong sa utang kag nag-utas sang kaugalingon nga kabuhi. Si Hontiveros ang nag-file sang “Kontra E-Sugal Act” agud dumilian ang pag-access sang publiko sa mga online gambling sites paagi sa mga e-wallets kag super apps.
