Kapin 23 ka mga estudyante sa Emiliano Lizares National High School ang ginpahayag may suspected case sang hand, foot and mouth disease (HFMD).
Sa interview sang DYHB sa School Principal Cherish Flor, ginpahayag sini nga Lunes sang aga sang ila una na-monitor ang mga rashes sa kamot sang duha ka mga estudyante kag ginsundan ini sang iban pa.
Sa karon, 23 na tanan ang may suspected case sang HFMD kag naka module learning lang anay sa ila mga panimalay.
Suno naman sa designated school nurse nga si Mievel Golingo, ang mga bitog-bitog sa lawas sang mga estudyante ang sintoma sang HFMD gani ila ginpakamaayo nga mag hand washing gid ang iban nga mga kabataan kag i-sanitize man ang mga classrooms agud indi na maglapta pa ang kagaw.
Ang 23 ka mga estudyante ang igapaidum sa medication kag observation sa sulod sang pito ka adlaw.
Ginkumpirma naman ni Barangay Granada Punong Barangay Nogi Vito nga may lima ka kindergarter learners nga nag positibo sa HFMD pero ini sila tanan ang naka rekober na kag naka balik na sa klase.
Panugyan naman sini sa pumuluyo sang Barangay Granada nga indi ma-alarma kag sa baylo, ipasiguro ang katinlo kag
pabakuron ang immune system ilabi na sang kabata-an para indi matapikan sang nasambit nga balati-an.