PROVINCIAL CAPITOL – Pito ka lugar sa Southern Negros Occidental ang naga-eksperyensiya sang pagbaha bangud sang Southwest Monsoon nga ginpabaskog sang Tropical Depression Crising.
Suno kay PDRRMO Head Irene Bel Ploteña, ang pagbaha na-record sa Hinoba-an, Cauayan, Kabankalan City, Himamaylan City, Binalbagan, Ilog kag Moises Padilla.
Base sa ila nga monitoring, taga-tuhod tubtob hawak ang baha sa iban nga mga lugar.
Iban nga mga dalan ang indi malabyan sang baha samtang indi man maagyan ang highway sa Barangay Cabagna-an sa La Castellana bangud sang natumba nga kahoy apang ginaaktuhan na ini sa karon.
Nagluntad man ang lapngon nga power outage sa 17 ka mga barangay sa Sipalay City apang natigayon man nga mabalik ang suplay sang kuryente kun sa diin pila na lamang ka lugar ang may intermittent power supply.
May mga reports man sang evacuation sa nasambit nga mga lugar apang padayon pa nga gina-collate ang data sa karon.