Bangud sang heartbreak sa iya anay ka-long term relationship, nagdesisyon ang isa ka 38-anyos nga babayi nga panahon na para mag-umpisa liwat sa iya kabuhi kag maghalin sa ila gina-istaran nga apartment sa Melbourne, Australia. Nagpuyo siya sa isa ka Airbnb sa sulod sang duha ka bulan, sa diin tuman gid kamahal sang iya gin-gasto, kag sang nagsugod siya pangita sang mas barato nga apartment, nadiskubrehan niya nga indi man gani nagmi ang mga option. Pero sang nagbisita siya sa iya tiya sa isa ka retirement village kag nag sugilanon nga nagapangita ini sang lugar nga pwede niya maistaran, ginpamangkot siya sang tigulang kun gusto niya i-try ang apartment nga bag-o lang nagbukas sa amo nga village. Suno sa iya tiya, indi problema ang iya kahubinon, gani nagdesisyon siya nga kumpletohon ang mga papeles kag i-try ang pagpuyo sa retirement home. Suno sa iya, ini ang pinakamaayo nga desisyon nga iya nahimo sa iya kabuhi. Isa pa gid sa nanamian sini bangud ang iya two-bedroom nga apartment sa retirement village barato gid! nagabalor lang ini sang AU$500 upod na ang service fee, samtang ang average nga duha-ka-kuwarto sa Melbourne naga-range sang AU$2800 tubtob AU$3200. Pero indi lang ini ang rason kung ngaa palangga niya ang pagpuyo sa retirement home. Ginhandum niya ang isa ka malinong nga kabuhi, kag mapalibutan sang mga masinadyahon kag maabi-abihon nga mga kasilingan nga luyag pirmi magbulig. Bisan madamo ang naga-usisa kun indi bala boring ang pagpuyo sa retirement village, ginpahayag sang babayi nga therapeutic ini para sa iya. Nagabugtaw siya sa huni sang oldies-but-goodies sang iya mga kasilingan, nagakape, nagabasa sang diyaryo, kag naga-lakat-lakat sa aga. Naga-chair yoga man ini, naga-bike, nagabingo kada Miyerkules, kag nagaobra man sang iya freelance nga trabaho. Apisar may iban nga naga-tawa lang ang iban, kag ang iya pamilya nagapate gihapon nga masyado pa siya kabata para magpuyo sa retirement home, pero ginbaton na sang 38-anyos nga babayi ang iya bag-o nga lifestyle kag wala siya plano nga maghalin sa iya bag-o nga komunidad.
