Gin-anunsyar sang Malacañang nga suspendido ang klase kag trabaho sa gobyerno bwas nga adlaw, Hulyo 23 sa 37 ka mga probinsya sa Pilipinas kun sa diin kabahin diri ang Negros Occidental.
Samtang ginklaro man sang City Government sang Bacolod nga apisar nagatindog bilang Lone District, nalakip man ini sa lugar kun sa diin suspendido ang trabaho kag klase.
Ini ang gin-announce pinaagi sa Memorandum Circular No. 90 nga ginpagwa sang Malacañang sini nga hapon, Hulyo 22 kag sa Memorandum Order No. 017 gikan sa Negros Occidental Governor Bong Lacson may angut sa rekomendasyon sang National Disaster Risk Reduction and Management Council (NDRRMC).
Ini ang may kaangtanan sa nagapadayun nga epekto sang Southwest Monsoon ukon Habagat.
Sa karon, ginpaidalum na sa Blue Alert Status ang Provincial Disaster Risk Reduction and Management Council Emergency Operations Center sang Negros Occidental kag nagapadayun nga nagamonitor sa lakat sang panahon.