PROVINCIAL CAPITOL – Na-apresyar sang Sangguniang Panlungsod sang Silay ang pagtambong sang city health officer nga si Dr. Krisna Sharie Barnuevo sa ila nga regular session, Lunes sang aga, agud magpaathag sa tunga sang mga issue sa iya nga opisina.
Ini ang ginpabutyag ni Silay City Vice-Mayor Tom Ledesma, nga presiding officer sang Sangguniang Panlungsod, sa exclusive interview sang DYHB.
Suno kay Ledesma, maayo bangud nakapaathag si Dr. Barnuevo sa mga issue kasubong sang mga requirement sang DILG sa Local Health Board angot sa mga health facilities nga wala natuman kag subong man ang alegasyon nga may nagkala-expire nga mga bulong nga wala mahatag sa mga nagakinahanglan.
Nag-ugat ang issue matapos nga may nagpadala sang picture sa bise-alkalde, kag subong man kanday Councilors Mykol Velez kag Toti Lopez nga nagapakita sang expired nga stocks sang azithromycin.
Una na nga ginpaathag ni Dr. Barnuevo nga wala napanghatag ang amo nga mga bulong antes pa man ma-expire ang mga ini bangud nagakinahanglan sang reseta kag indi tanan nga reseta ang nagasaad sang amo nga antibiotics.
Wala man nila ini basta na lang ginatugyan sa barangay health stations bangud isa ini ka prescription medicine.
Suno kay VM Ledesma, mismo siya ang namangkot sa city health officer kun matuod nga may nagkala-expire nga bulong sa CHO kag kun ano ini kadamo apang sabat ni Dr. Barnuevo, wala na maisip ang nasambit nga mga bulong bangud nahaboy na ini.
“Amo to gani nga gin-invite siya namon para mapangayuan siya, mamangkot so she denied. Hambal niya wala na kay na-dispose na.”
Aminado si Vice-Mayor Ledesma nga wala na sila sang mahimo angot diri bangud ang konseho ang wala man sang investigative functions.
“Wala na kami may mahimo because we don’t have investigative functions. Ang amon lang, to clarify things lang”, dugang pa sang bise-alkalde.
Ginklaro naman ni Vice-Mayor Ledesma nga wala sang akusasyon batok kay Dr. Barnuevo kag sa baylo, luyag lamang sang SP nga makakuha sang kasanagan gikan sa iya bilang head sang CHO, nga sa isa ka opisina sa idalom sang Silay City Government.
Nagapabor kag nagapasalamat naman si Ledesma sa pahayag ni Dr. Barnuevo nga kinahanglan ipahigad ang politika kag mag-ugyon ang mga ini sa pagserbisyo sa mga pumuluyo sang Silay.