Nagapabilin pa karon sa evacuation center sa banwa sang Binalbagan, La Carlota, La Castellana kag San Enriques ang 206 ka mga pamilya ukon 888 ka mga indibidwal nga naapektuhan sang pagbaha sa pagpanalasa sang Bagyong Crising kag habagat sa probinsya sang Negros Occidental.
Sa interview sang DYHB kay Provincial Disaster Risk Reduction Management Office head Irene Bel Ploteña, ginpahayag sini nga sa ila nga assessment, naglab-ot sa 8,142 ka mga pamilya ukon 31,346 ka mga indibiwal ang gin-evacuate sa nagkalain-lain nga lugar sa probinsya bangud sang pagbinaha tinalikdan nga semana.
Sa nasambit nga pagbaha, kapin anum ka mga persona ang gin-report sang Provincial Health Office (PHO) nga ginbawian sang kabuhi.
Sa pihak nga bahin, dako man ang epekto sang pagbaha sa agrikultura sang probinsya ilabi na sa ciudad sang San Carlos, Valladolid kag Isabela.
Kapin P2,376,000 naman ang nangin epekto sa livestocks samtang indi pa matumod karon ang kahalitan sa imprastraktura.
Suno kay Ploteña, pinaka naapektuhan sang baha amo ang banwa sang Ilog, Binalbagan, Isabela kag Hinigaran.
Dugang pa sini nga may pila na ka nga ciudad kag munisipalidad diri sa probinsya nga nakalab-ot sa parameters sang National Disaster Risk Reduction Management Council (NDRRMC) sa pagdeklarar sang State of Calamity.
Gin-abisuhan man sini ang mga negrosanon nga maghalong kag magkooperar sa abiso sang ila tagsa ka mga LGU ilabi na kun malain ang tiyempo.