PROVINCIAL CAPITOL – Kalabanan sa mga humayan sa Negros Occidental nga naapektuhan sang naglabay nga pag-inulan sang nagligad nga semana ang bag-ong sabwag kag amat-amat na kuntani nga nagatubo.
Ginpahayag ni Engr. Jose Albert Barrogo, ang regional executive director sang Department of Agriculture sa Negros Island Region, ang apektado nga mga humayan ang target na kuntani nga anihon sa ulihi nga semana sang Agosto ukon una nga semana sang Setyembre.
Sa tunga sang mga epekto sang naglabay nga kalamidad, nakahanda naman ang Department of Agriculture sa pagbulig sa apektado nga mga mangunguma paagi sa paghatag sang libre nga binhi agud liwat sila nga makatanom.
Suno kay Barrogo, ang mga binhi ang pagakuhaon sa Philippine Rice Research Institute ukon Philrice.
Ginpasiguro naman ni Engr. Barrogo nga sarang maka-claim sang indemnity ang mga mangunguma nga nagpa-rehistro sa crop insurance.