Gina-finalize na karon sang City Government of Bacolod ang next phase sa liwat nga pagbaligya sang tag P20 nga bugas sini nga Agosto.
Sa interview sang DYHB kay City Administrator Atty. Mark Steven Mayo, ginpahayag sini nga ila na ginatun-an ang pila ka mga butang kaangay sang pagkakas sang priority sa mga baligyaan bugas kag ubrahon ini nga bukas para sa tanan nga mga Bacolodnon, pagtuon kun bala padayunon ang pagbaligya sini sa kada barangay, kag kun ano bala kadamo ang ibaligya nga bugas. Ini agud masiguro man nga episyente ang pagpatuman sang ciudad sa rice program sang gobyerno.
Ila man gina-asses kun diin bala nga bahin ang kinahanglan ma-improve sa una nga pag-implementar sini sang nakaligad nga administrasyon.
Dugang pa sini nga ginatapos na ang sang City Cooperative and Livelihood Development Office (CCLDO) ang documentation kag igapasa na lang ini sa City Treasurer’s Office.
Ginpahayag pa sini nga isa sa ila ginpasiguro amo ang pagpangayo sang authority sa Sangguniang Panlungsod agud mag-ubra sang special trus fund account para sa ini nga programa.
Sa ila inisyal nga assessment, kapin P5.8 million ang igapagwa mga budget sa next phase sa pagbaligya sang tag-20 nga bugas sa ciudad.