Magapadayon subong nga adlaw, July 23,2025 ang clearing operations sang ciudad sa mga creek diri sa Bacolod City apisar nga malain ang panahon kag suspendido ang trabaho sa mga government offices.
Sa interview sang DYHB kay City Administrator Mark Steven Mayo, ginpahayag sini nga las-9 sini nga aga, magasugod na sila panghawan sang creek sa bahin sang Barangay Banago.
Ini agud nga malikawan ang pagsupon sang mga alagyan sang tubig kag posibilidad sang pagbaha kun magbubo ang makusog nga pag-ulan.
Suno kay Atty. Mayo nga ila nakita sa ila paglibot-libot nga clog sa ginagwaan sang tubig ang isa sa mga rason sang pagbaha.
Dugang pa sini, “massive” karon ang pagpaninlo sang ciudad sa mga creeks ilabi na sa suludlon nga mga parte agud masiguro nga makalab-ot gwa sa suba ang nga tubig.
Sa pihak nga bahin, apisar nga suspendido ang klase kag mga trabaho sa gobyerno sini nga adlaw diri sa Negros Occidental bangud sang malain nga panahon, “on duty” sa gihapon ang pila ka mga opisina sa ciudad sang Bacolod kaangay sang City Mayor’s Office, Bacolod Environment and Natural Resources Office (PENRO), City Engineering’s Office (CEO) kag City Disaster Risk Reduction Management Office (CDRRMO).
Samtang, naka-skeletal workforce naman ang iban nga Department and Office head.