PROVINCIAL CAPITOL – Nagdangat sa kapin P1.9 million ang balor sang food assistance nga napalab-ot sang Provincial Government sang Negros Occidental sa mga pumuluyo nga naapektuhan sang pag-ulan nga dala sang Southwest Monsoon kag Bagyo Crising sang nagligad nga semana.
Ginpahayag ni Provincial Social Welfare and Development Office Head Chiqui Gonzales nga kabug-usan nga 3,200 ka mga pamilya nga gin-evacuate ang ila nahatagan sang food packs.
Ginklaro naman sini nga nagtakop na ang ila pagpalab-ot sang ayuda sa mga apektado sang Bagyo Crising samtang padayon naman sila nga nagapanghanda paagi sa pagputos sang mga food items para sa mga possible maapektuhan sang Bagyo Dante kag Bagyo Emong.