Nakahanda na ang P400 million nga bulig sang Department of Agriculture- Negros Island Region (DA-NIR) sa mga apektado bangud sang makusog nga pag-ulan kag pagbaha sa rehiyon.
Sa interview sang DYHB kay DA-NIR Director Engr. Albert Barrogo, ginpahayag sini nga ila na karon ginatinguhaan nga ma-facilitate ang paghatag sang bulig sa affected farmers kag fisherfolks pinaagi sa Philippine Crop Insurance Corporation (PCIC) nga amo ang magahatag sang crop insurance, sa mga nagkalamatay nga sapat kag mga naguba nga baruto.
Dugang pa sini nga iga-validate naman sang Philrice ang mga nangin halit sang bagyo sa mga rice farmers agud mahibaluan ang inog-distribute nga seeds sa mga ini.
Apang, wala pa sa karon sang instruction kun pila ukon may ara pa mabaton nga financial aid ang mga farmers halin sa opisina.
Dugang pa sini nga kun gamay lang man ang halit sa mga kasapatan kag may available nga stocks sa ila opisina, ila lang ini pagabayluhan sa bulig man sang Provincial Government of Negros Occidental bangud nga may available man nga resources nga pwede hulagon sa ila mga research stations.
As of July 22, 2025 kapin P44 million ang total damage sa agrikultura sa NIR— kalabanan sa Negros Occidental.