WORLD NEWS- Nagapanawagan sang ceasefire ang Cambodia sa Thailand sa tunga sang nagataas nga death toll tuga sang kinagamo sang duha ka pungsod. Nagdangat na sa masobra 30 ka tawo lakip na ang mga sibilyan ang nautas nga kabuhi tuga sang kinagamo sa border. Suno sa ambassador sang Cambodia sa United Nation nga si Chhea Keo, luyag nila sang matawhay nga solution sa kinagamo. Samtang ginpahayag naman ni Maris Sangiampongsa, foreign minister sang Thailand, kinahanglanon nga ipakita sang Cambodia nga luyag nila matapos ang kinagamo nga may sinsiridad. Nahibaluan, yara na sa lapit 200,000 ka tawo ang nagbiya sa ila mga panimalay nagikan sa duha ka mga pungsod. Madumduman, nagdeklarar ang Thailand sang martial law sa walo ka mga distrito nga nahamtang sa border sang Cambodia.
