Gindagdagan sang show cause order ang anay head sang Office of the Building Official (OBO) sa gina-alegar irregular approval kag solicitation sang kwarta kabaylo sang pagproseso sang occupancy permit.
Ang show cause order ang ginpapanaog sang Office of the City Mayor nga napetsahan Hulyo 29 kag gin-serbe kay former OBO head, Engr. Isidro Sun, kahapon, Hulyo 30, 2025.
Base sa kopya sang show cause order, sang Hunyo 30, 2025, las-3 sang hapon, isa ka job order employee sa OBO, ang ginmanduan ni Engr. Sun nga aprubahan kag i-clear ang business permit application sang isa ka commercial space and rental nga may address sa Brgy. Mansilingan, Bacolod City apisar nga wala ini sang duly issued Certificate of Occupancy.
Santo sa incident report sang OBO, wala nag-agi sa regular processing protocol ang amo nga application kaangay sang logbook entry kag proper endorsement gikan sa designated officer nga naga-log sang incoming applications kag gina-refer sa inspection. Gin-alegar nga si Sun ang direkta nga nag-insert sang application sa processing line kag ginmanduan ang JO nga i-clear ang application.
Sang Hunyo 28, las-11:50 sang aga, gin-alegar nga si Engr. Sun ang nagtawag sa isa ka indibidwal, kag nag-demand sang ₱13,000 kag sang ulihi nanegosyar sa ₱11,000, bilang kondisyon sa pag-release sang Occupancy Permit.
Sang Hunyo 30, gin-alegar nga gin-deliver kay Engr. Sun ang ₱11,000.
Kon mapamatud-an ang mga alegasyon, ini ang maga-constitute sang Grave Misconduct, Serious Dishonesty, and Conduct Prejudicial to the Best Interest of the Service, punishable sa idalom sang 2017 Rules on Administrative Cases in the Civil Service (RRACS) subong man violation sang Section 13 sang RA 11032 ukon Anti-Fixing under the ease of doing business law.
Si Engr. Sun ang ginhatagan sang 72-hours para magsabat sa show cause order.
Suno naman kay City Legal Officer, Atty. Karol Joseph Chiu, imbestigaran ini nga mga alegasyon kag hatagan sang due process ang natungdan. | DYHB News