Gin-deny sang former head sang Office of the Building Official (OBO) ang alegasyon sa pagpangilkil matapos gindagdagan sang show cause order.
Sa interview sang DYHB kay Engr. Isidro Sun Jr. , ginpahayag sini nga indi matuod nga nagbaton ini sang ₱11,000 gikan sa business owner nga nagproseso sang occupancy permit. Suno kay Engr. Sun, alegasyon lamang ini kag subong nga adlaw magapasa ini sang sabat matapos nabaton naman sini ang show cause order nga pirmado sang alkalde.
Gin-deny man ni Engr. Sun nga ginmanduan sini ang job order employee sa OBO nga i-clear kag aprubahan ang application sang business owner.
Suno diri, wala siya sang gahom sa mga JO kag ang nangin papel lamang sini sa proseso, amo nga siya ang nag-inspection sang lugar sang business owner sa Brgy. Mansilingan.
Ang gin-inspection sini isa ka daan nga balay nga ang parte ang paarkilahan sa diin sa iya paglantaw, indi na kinahanglan nga gawaran sang building kag occupancy permit kaangay sa iban nga man nga istruktura sa area.
Suno pa kay Engr. Sun, ginpasa sini sa JO ang kopya sang inspection kag wala na ini nakahibalo kon diin ang routine nga pasahan. Suno pa diri, dapat ang JO ang ginpapanaugan show cause order.
Gindugang man sang anay OBO head nga kon may yara sang reklamo batok sa iya kuntani, ginkadtuan siya sa opisina apang gintago lamang ini, suno sa iya. | DYHB News