Nag-umpisa na subong nga adlaw, August 1,2025 ang napulo ka adlaw nga Commission on Elections (COMELEC) voter registration sa SM City Bacolod- North Block.
Sa interview sang DYHB kay COMELEC Bacolod Election Officer Atty. Katrina Trinio Caña, ginpahayag sini nga 500 lang anay ka mga tawo ang ila i-cater para magparehistro subong nga adlaw agud ila man ma-monitor kun ano kadasig ukon kahinay ang lakat sang linya.
Apang iya ginklaro nga basi sa mga masunod nga mga inadlaw, magabaton man sila sang lapaw sa 500 ka mga registrants, depende sa sitwasyon.
August 1,2,4 kag 5 lamang ang schedule diri sa SM City North Block kag sa August 6-10 naman, didto igasaylo sa Robinsons Place Bacolod ang registration.
Ang mall registration ang maga-umpisa las-8 sang aga tubtob las-5 sang hapon.
Ginklaro naman ni Atty. Caña nga wala sila sang transfer of registration nga serbisyo sa karon amo kun nga indi na dapat nga magkadto pa sa mga mall ang may kaangay nga concern.
Samtang, ang mga nagparehistro naman sa Sangguniang Kabataan (SK) tinalikdan nga mga eleksyon ang indi namn kinahanglan pa magparehistro liwat bangud yara pa ang ila pangalan sa COMELEC.
Sa mga naglab-ot na 18 years old nga nagparehistro sadto sa SK ang napangsaylo naman ang pangalan sa regular voter database amo kun ngaa indi na kinahanglan pa nga magparehistro ang mga ini liwat.
Sa pihak nga bahin, sa mga wala naman nakaboto sa duha ka consecutive elections ang pwede nga maka-proseso online.
Para sa reactivation, mag-download lang sang application form sa WWW. COMELEC.GOV.PH, i-print out ini, mag fill-out sang form, pirmahan, i-scan ang form, i-scan man ang imo valid ID kag mag selfie nga uyat ang Valid ID kag i-email ini tanan sa BACOLOD COMELEC. GOV. PH.
Ginaabisuhan man ang mga ini nga i-check sa tanan nga oras ang email para sa reply sang COMELEC agud ma-schedule ang mga ini para sa interview.
Ginalauman nga kapin 10,000 ka mga dugang nga voters diri sa Bacolod ang maparehistro sa pulo ka adlaw nga mall voter registration.