Nagapadayon ang pag-proseso sang papeles para sa pagbakal sang Provincial Government sang Negros Occidental sa duta nga pahamtangan sang relocation site nga sayluhan sang mga nagaistar sa sulod sang 4-kilometer radius permanent danger zone.
Ginpahayag ni Provincial Administrator Atty. Rayfrando Diaz II nga sa karon, yara na sa lebel sang Bureau of Internal Revenue (BIR) ang mga papeles kag magasunod naman ang pagproseso sini sa Registry of Deeds tubtob nga pormal nga mabayaran sang Capitolio ang propyedad.
Una na nga gin-aprubahan sang Sangguniang Panlalawigan ang pagbakal kag pirmado naman ni Governor Bong Lacson ang deed of sale.
Nahibaluan nga nagalapad sang 8.6 hectares ang duta sa Barangay Talaptap sa banwa sang La Castellana nga pagabaklon sang probinsiya sa bili nga P180 per square meter ukon P15 million sa kabug-usan.
Suno kay Atty. Diaz, magapakig-angot sila sa Department of Human Settlements and Urban Development (DHSUD) agud mag-follow-up sa request para sa P210 million pundo agud i-develop ang relocation site.
Nahibalun gikan sa provincial administrator nga ang DHSUD ang nagtulod sa ila sa pagpadala sang sulat agud maghingyo sang amo nga pundo.