PROVINCIAL CAPITOL – Pabor para sa lokal nga mga mangunguma ang pagpatuman sang 60 ka adlaw nga suspension sa rice importation sumugod sa Setyembre 1.
Ini ang ginpahayag ni Pedro Limpangog, ang presidente sang Federation of Irrigators’ Association of Central Negros-Bago River Irrigation System (FIACN-BRIS), kasunod sang pagmandu ni President Ferdinand Marcos Jr. sang duha ka bulan nga rice importation suspension.
Gin-aktuhan ni PBBM ang rekomendasyon ni Agriculture Secretary Francisco Tiu Laurel nga ang mayor nga tinutuyo amo nga maproteksyunan ang local nga mga mangunguma gikan sa tuman kanubo nga presyo sang humay durante sang palaabuton nga harvest season.
Apang ginklaro ni Limpangog nga wala sila nagapamatok sa presensiya sang imported nga bugas sa mga merkado apang ila ginaduso nga indi man tuman kanubo sang presyo sang humay nga ginabakal sa ila samtang indi man ini mangin tuman kamahal para sa mga konsumidor.
Una na nga ginmanduan ni President Marcos ang National Food Authority nga magbakal sang fresh palay sa bili nga P18 kada kilo.
Suno kay Limpangog, yara sa P13 kada kilo ang capital sang mga rice farmers samtang yara lamang sa P14 tubtob P15 kada kilo ang gate price ukon yara lamang sa piso ang ginansiya sang mga ini.
Ila ginaduso nga mapataas ang bili sang fresh palay sa P20 tubtob P30 kada kilo.*Photo by Pedro Limpangog