Nagpasalig ang Bacolod City Water District (BACIWA)- Primewater nga may nangin negosasyon na ini sa Bacolod Bulk Water Incorporated (BBWI), gani wala sang dapat kahangawaan ang mga konsumidor sa pag-untat sang operasyon sang kumbuyahan.
Una na nga nagpagwa sang advisory sang BBWI nga dapat magpanigana ang mga residente sang Barangay Sum-ag, Cabug, Felisa, Handumanan, Mansilingan, Punta taytay, Pahanocoy kag Tangub bangud sang posible water shortage tinalikdan nga August 9 kag kun indi pa gid makabayad ang Primewater sa BBWI subong nga adlaw, August 11, maga-disconnect ini.
Sa interview sang DYHB kay BACIWA General Manager Mona Dia Jardin, ginpahayag sini nga may internal arrangements na sa tunga sang Primewater kag BBWI karon sa diin ila ginapasalig nga indi maapektuhan ang operasyon sa pagdul-ong sang matinlo nga tubig sa mga konsumidor.
Ginklaro man sini nga ang tanan nga operation lakip ma ang billing kag collections ang yara sa idalom sang Primewater kag kada 30 days nagabayad ini sa BBWI injection Point 1 kag pagkatapos sang 45 days naman ang bayranay sa injection Point 2.
Suno kay Jardin may mga tion gid man nga delayed ang pagbayad sang Primewater sa BBWI apang nagatinguhanman ini nga makabayad kada bulan.
Dugang pa sini nga kun madula gid man ang 20 Million Liters A Day sa injection point 1, may kapin 87 pa sa gihapon ka mga deep wells ukon spring nga pagakuhaan sang supply sang tubig para sa mga natumod nga mga lugar.