PROVINCIAL CAPITOL – Nagnubo ang presyo sang karne sang baboy sa mga merkado sa palibot sang Negros Occidental.
Ginpahayag ni Alliance of Hog Raisers Association of Negros Occidental (AHRANO) President Ric Lauron nga nagahamboy sa P230 tubtob P250 ang kada kilo sang karne sang baboy sa karon, mas manubo ikumparar sa P280 tubtob P300 kada kilo sadto.
Yara naman sa P140 tubtob 160 ang kada kilo sang liveweight sang baboy subong, manubo ikumparar sa P200 sang tinalikdan.
Suno kay Lauron, ini bangud amat-amat na sa pagbalik sa pagsagod sang baboy ang mga mangunguma sa probinsiya kag may yara na sang suplay.
Subong man, kinaandan na nga nagabarato ang karne sang baboy tagsa bulan sang Agosto, nga ginbansagan “tigkiriwi” kun sa diin nagadali ang mga hograisers nga ibaligya ang ila mga baboy para sa kinahanglanon sa eskwelahan kag panimalay.
Apang suno kay Lauron, malauman ang liwat pagsaka sang karne sang baboy sa “Ber months”.
[Web Photos]