Ang St. James the Greater Church sa Talisay City, Negros Occidental, Pilipinas, amo ang replica sang St. James Church sa Medjugorje, Bosnia-Herzegovina. Ini ang una kag isa lang nga replica sang Medjugorje church sa Pilipinas kag sa bug-os nga Asia, kag ika-apat sa bug-os nga kalibutan.
Ini bangod sang isa ka pamilya nga Negrense nga nag-pilgrimage sa Medjugorje kag ang ila handum nga magtukod sang kapareho nga lugar para sa espirituhanon nga pagpamalandong nga sa ulihi natuman.
Detalyado ang pagkahimo sang simbahan sa Talisay — halin sa facade, kadakuon, tabernacle, stained glass, mga imahe, mga bangko, tubtob sa confessional boxes.
Ang disenyo sang stained glass ginhimo ni Cesar Posesion sang Victorias City, nga gin-aprobahan sang Croatian nga artist nga si Branimir Dorotic.
Makita ang simbahan sa Hacienda Manaul, Barangay Matab-ang, Talisay City.