PROVINCIAL CAPITOL – Nagalaum si Central Philippines State University (CPSU) President Dr. Aladino Moraca nga masolbar na ang problema sa duta nga ginahamtangan sang ila nga campus sa banwa sang Moises Padilla.
Sa exclusive interview sang DYHB, ginpahayag ni Dr. Moraca nga sang makalab-ot sa iya igtalupangod ang pag-withdraw sang Provincial Government sa pagbakal sang duha ka ektariyas nga duta nga kabahin sang campus sang CPSU-Moises Padilla, gilayon nga gin-review sang tagdumalahan sang unibersidad kun ano ang possible nila nga mahimo agud indi maghalin ang eskwelahan sa lugar.
Nagapati ang university president nga kun maistoryahan sang maayo, masolbar ini nga issue.
Kaina sang aga, ginsapol man Dr. Moraca ang mga ginikanan kag mga estudyante kag ginpasiguro sa mga ini nga wala sila sang dapat kabalak-an.
Nahibaluan nga ang pag-isol sang Capitolio sa pagbakal sang duta ang bangud wala nagakooperar ang Pamilya Nazareno kag luyag sang mga ini nga pataasan ang presyo sa baylo sang P25 million nga nakasugtan.
Aminado si Dr. Moraca nga ang pagbakal sang probinsiya kuntani ang pinakamaayo nga solusyon sa problema apang mangin siya ang indi makahambal kun matigayon ini.*Web Photos