PROVINCIAL CAPITOL – Nakahanda ang Provincial Government sang Negros Occidental nga magbulig sa Central Philippines State University (CPSU) sa tunga sang problema sa duta nga ginahamtangan sang ila campus sa banwa sang Moises Padilla.
Ginpahayag ni Provincial Administrator Atty. Rayfrando Diaz II nga kun magdangop ang CPSU kay Governor Bong Lacson kag may yara sila sang proposal, lantawon sang Capitolio kun sa diin ini sarang nga makabulig.
Apang ginklaro ni Atty. Diaz nga sa CPSU magahalin ang solusyon kag magabulig lamang ang probinsiya.
Nahibaluan nga pagabaklon na kuntani sang Provincial Government ang duha ka ektariyas nga duta nga ginatindugan sang CPSU-Moises Padilla sa balor nga P25 million apang nag-isol ini bangud wala nagakooperar ang tag-iya nga Pamilya Nazareno kag luyag pa nga pataasan ang presyo.