Nagapanindugan ang City Legal Office (CLO) nga wala ini sang may ginlapas nga layi ukon proseso sa ila liwat nga pag-demolish sa mga straktura sa Purok Riverside, Barangay Bata kahapon, August 11,2025.
Ini sa pihak sang singgitan sang pila ka mga residente sa lugar nga private property ini.
Sa interview kay City Legal Officer Atty. Karol Joseph Chiu, ginpahayag sini nga kun nakahibalo ang ini nga mga tawo nga may kinamatarong sila magtinir sa lugar, dapat nagkadto ang mga ini sa korte kag nagkuha sang Temporary Restraining Order (TRO).
Pahayag pa sini nga ang ciudad ang magapadayon lang sa gihapon sa proseso kag pagsunod sa una na gin-survey sang City Engineers Office nga panggub-on ang mga obstruction lapit sa easement.
Suno kay Chiu, 2016 pa sang gin-request nga i-clear kag gindagdagan sang notice ang nasambit nga mga structure kag sang sini nga tuig lang ini liwat gin-renew.
Kag sang ila una nga pag-demolish, nag-ayo pa gani ang mga residente nga maga self-demolish na lang sila sa August 11.
Dugang pa sini nga nag-agi ini sa evaluation sang housing board kag nag-witness pa ang Presidential Commission for the Urban Poor (PCUP).
Suno kay Chiu, kun sala ang ila gin-ubra, dapat ang PCUP ang una nga magpugong sa ila.
Sa pihak nga bahin, ginpahayag ni Alyas Joane, reside sang nasambit nga lugar nga nag-appeal na sila bangud nga ang nabutang lang man sa notice amo ang pag-demolish sa mga structure nga 3 meters lang ang kalayuon sa creek.
Pero ngaa ang ila nga baligyaan kag puluy-an nga 15 meters ang kalayuon sa suba ang ginguba man?
Panindugan sini nga dapat kun bilog nga structure ang ginguba, dapat ginhatagan sila sang relocation.
Base sa ila pagkonsulta sa Department of Environment and Natural Resources (DENR), ginpahayag nga private property gid man ini. Liw-as sa gina insister sang ciudad.