Ipaidalom sa tatlo ka bulan nga renovation ang emergency room (ER) sang Corazon Locsin Montelibano Memorial Regional Hospital (CLMMRH) sugod sa Setyembre sini nga tuig.
Suno kay Dr. Joan Cerrada, Medical Center Chief II sang CLMMRH, samtang nagapadayon ang renovation, magabutang sang temporary ER sa sulod mismo sang hospital nga butangan sang 14 beds.
Suno kay Dr. Cerrada, akomodaron sa temporary ER ang mga malala na gid ang kondisyon kag ang iban nga pasyente ilabi na ang mga halin sa Bacolod, sila ang i-navigate sa mga malapit nga private hospitals nga magapreparar man sang beds para sa mga pasyente halin sa CLMMRH.
Magahikot sang memorandum of agreement (MOA) sa mga private hospitals para akomodaron ang ER patients nga halin sa regional hospital.
Magapakig-angot man ang regional hospital sa mga city kag municipal Disaster Risk Reduction and Management Office (DRRMO) para sa navigation sang mga pasyente antes dal-on sa hospital.
Ang mga ER patients nga dal-on sa private hospitals ang iga-discharge pagkatapos kag ang regional magabayad sa diin ipaagi sa mga mandatory discounts kaangay sa senior citizens, persons with disability (PWD) kag Bacolod City Comprehensive Health Program (BacCHP) para sa mga Bacolodnon.
Kon dako pa gid ang balayran, pangitaan sang regional hospital sang pondo gikan sa iban nga sources kaangay sang Department of Social Welfare and Development (DSWD) kag PAGCOR.
May ₱92 million nga pondo para sa renovation sang ER sang regional hospital. | DYHB News