“Indi worth it” ang Joint Venture Agreement ( JVA) sa tunga sang Bacolod City Water District (BACIWA) kag Primewater suno kay BACIWA board president Atty. Sonya Verdeflor.
Sa interview sang DYHB kay Verdeflor, ginpahayag sini nga madamo na sang violation ang Primewater sa nasambit nga JVA kag sa karon, ila na gintun-an kun bala ipadayon pa ini.
Isa sa mga problema sang Primewater suno kay Verdeflor amo tuman sini ka “centralize,” sa diin halos tanan nalang nga desisyon, ipalab-ot pa una sa ila Central Office, rason man nga nagaka-delay ang mga pagbuhat sang desisyon.
Suno sa abogado, tatlo ka bulan pa ang arrears sang Primewater sa Bacolod Bulk Water Incorporated (BBWI) sa diin sa bulan sang Mayo kag Hunyo, naglab-ot na sa P5 million ang ila balayran.
Kun indi pagid ini ma settle, sini nga mga inadlaw magadugang pa gid ang bill para sa bulan sang Hulyo.
Suno kay Verdeflor, may mga responsibilidad man ang BBWI sa mga tawo sini, may mga paswelduhan kag may mga balayaran amo kun ngaa dapat mas na intyendihan ini sang Primewater.
Kun si Verdeflor pa ang pahambalon daw “Financially Distressed” na ang Primewater.
Paathag pa sini nga Policy Making Body lang sila sang BACIWA kag separado sa management sini.
Pila sa mga violations sinj sa JVA amo ang wala pagtuman sa ila ginpasalig nha 24/7 nga tubod sang tubig sa Bacolod, ang sa bahin sang Capital Expenditures nga P200 million sa first five years, kag P1.6 Billion sa infrastructures, sa karon, P130 million pa lang ang nagtupa suno kay Verdeflor.