PROVINCIAL CAPITOL – Sarang na nga maka-apply sang calamity loan sa Social Security System (SSS) ang mga myembro nga taga-Bacolod City kag mga banwa kag ciudad nga sakop sang Negros Occidental.
Ginpahayag ni Josefa Pineda, Regional Communications Analyst sang SSS Visayas West 1 Division, nga sa pihak nga ang Provincial Government lamang ang nagdeklarar sang state of calamity, nalakip naman diri ang Bacolod City.
Suno kay Pineda, may mga Bacoleño nga nag-apply sang calamity loan kag na-grant ang ila nga application.
Ang SSS calamity loan ang equivalent sa isa ka bulan nga sweldo sang myembro kag indi maglapaw sa P20,000 nga bayaran sa sulod sang duha ka tuig sa 7% nga interest rate.
Sarang mag-apply paagi sa online SSS account sang kada myembro.
Nahibaluan nga nagdeklarar sang state of calamity ang Negros Occidental bangud sang mga epekto sang Bagyo Crising kag peste nga RSSI sa mga katubuhan.