Indi na luyag mag-intra ni Mayor Greg Gasataya sa pagpangusisa sang national government kag Office of the President sa mga flood control projects.
Sa interview kay Mayor Gasataya, ginsiling sini nga ang tanan nga flood control projects sa Bacolod ang sa idalom sang Department of Public Works and Highways (DPWH) kag ini ang gin-base sa 2017 comprehensive drainage masterplan.
Ang masterplan suno sa alkalde, ang ginhimo sang DPWH kag ang ahensiya ang makahatag update sa progress sang mga proyekto.
Suno kay Gasataya indi na sini luyag mag-intra sa pagpangusisa sang national government kag sang presidente bangud madamo sang ulubrahon sa Bacolod.
“On the part sa Bacolod we have so much in our plate right now indi kami luyag pa nga mag-intra. I think the national government, DPWH and Office of the President are looking into it mo, so itugyan ta lang dira”, pahayag ni Gasataya sa media interview.
Ang himuon na lamang sang ciudad suno kay Gasataya amo ang pag-check sang mga naga-clog nga areas kag kon ano pa nga proyekto sa idalom sang comprehensive drainage masterplan ang wala na-implementar kag napondohan. | DYHB News