Indi pwede nga manglimpyo nga manglimpyo na lang ang ciudad.
Ini ang pahayag ni Mayor Greg Gasataya rason nga istrikto na nga ipatuman sang ciudad ang City Ordinance 531 ukon Anti-Littering Ordinance of Bacolod City sa diin ginadumilian ang paghaboy basura sa pampubliko nga lugar kag mangin sa mga ginaagyan sang tubig.
Sa press conference kahapon, ginpahayag ni Mayor Gasataya nga magasapol ini sa mga barangay officials sini nga semana, sa chairperson sang Committee on Environment and Ecology, Councilor Homer Bais kag Sangguniang Kabataan (SK) Federation para sa pagpatigayon sang Information, Education and Communication (IEC) campaign angut sa istrikto na nga pag-implementar sang CO 531.
Sa idalom sang ordinansa, multahan ang mga violators sang ₱500 sa first offense, kag ₱1,000 sa mga succeeding offenses kag may upod pa nga community service nga indi maglapaw sa 15 dias.
Sa karon, nagapadayon ang clean up drive sang city government sa mga waterways sa diin nagligad nga semana 17 tonnes sang basura kag silt ang nakuha sa isa ka suba sa Brgy. Bata. | DYHB News