NEGROS ISLAND REGION- Mas ginpasanyog sang Police Regional Office- Negros Island Region ang cyber patrolling sa possible nga pagbaligya sang illegal nga droga online.
Ginpahayag ni PRO-NIR Director Police Brigadier General Arnold Thomas Ibay, isa sa mga gina-monitor sa karun sang kapulisan sa rehiyon amo ang presensya sang “tuklaw cigarette.”
Ang tuklaw cigarette ang isa ka sahi sang illegal nga sigarilyo nga sikat sa pungsod Vietnam, ini ang may mataas nga content sang nicotine kag ini may mas delikado nga epekto sa tawo komparar sa marijuana.
Nahibaluan ang amo nga sahi sang sigarilyo ang patok sa mga kabataan ukon mga estudyante, rason nga luyag sang kapulisan nga sila ang matudluan nga indi ini pagsakdagon.
Nagpasiguro ang regional director nga indi pag-untatan sang mga kapulisan ang kampanya kontra illegal nga aktibidad ilabi na nga madamo sang nagatuhaw nga bag-o nga sahi sang illegal nga droga sa pungsod.