ESCALANTE CITY- Arestado sa kaso nga syndicated estafa ang fraternity leader kag nagpapili bilang alkalde sa bahin sang Barangay Mabini, sa ciudad sang Escalante.
Ang arestado ang ginkilala nga si Je-ar Escares, 36-anyos, kag residente sang Sitio Bangkal, Barangay Jonobjonob sa amo nga ciudad.
Ginpahayag ni PLt. Col. Albert Sy, hepe sang Escalante City Police Station, si Escares ang local leader sang Alpha Omega kag nagpapili bilang alkalde sang tinalikdan nga Midterm Election 2025.
Una nga ginserbehan sang warrant of arrest si Escares sang tinalikdan nga Miyerkules, Agosto 13, kag ginserbe ang dugang nga warrant sang Lunes, Agosto 18.
Suno kay Sy, madamo sang nagareklamo batok kay Escares bangod sa pagpanginto sini sa mga miyembro sang fraternity, kun sa diin sila ang nagabayad sang bulanan kag ginpromisahan sang ektarya nga duta kag kwarta bilang kabaylo apang wala ini natuman.
Nahibaluan ang grupo ni Escares ang indi lamang naga-operate sa ciudad sang Escalante, kundi may mga miyembro man ini sa pila ka bahin sang Negros Occidental kag Negros Oriental.
Nadiskubrihan man sang kapulisan, may ginkutkot nga duta ang arestado nga mangin serbe kuntani sini nga hideout.
Sa karun nagapabilin nga arestado si Escares sa Escalante City Police Station kag wala sang may ginrekomendar ang korte nga piyansa.